გორის მუნიციპალიტეტის სოფელ ხიდისთავში გზის რეაბილიტაცია იგეგმება.

აღნიშნული საგზაო ინფრასტრუქტურის მოწესრიგების მიზნით, გორის მუნიციპალიტეტის მერიამ ტენდერი უკვე გამოაცხადა.

როგორც ადგილობრივ თვითმმართველობაში აღნიშნავენ, პროექტის მიხედვით რეაბილიტაცია ჩაუტარდება გზის 900-მეტრიან მონაკვეთს და პროექტის სავარაუდო ღირებულება 482 990 ლარია.

„პროექტით გათვალისწინებული სამუშაოების შესყიდვის მიზნით გამოცხადებულია ტენდერი, ხოლო წინადადებების მიღება 7 თებერვალს დაიწყება და 12 თებერვალს დასრულდება.

ხიდისთავის გზის მონაკვეთის სარეაბილიტაციო სამუშაოები რეგიონებში განსახორციელებელი პროექტების ფონდის თანადაფინანსებით განხორციელდება. 2026 წელს აღნიშნული ფონდის თანადაფინანსებით გორის მუნიციპალიტეტში, ჯამში, 12 ინფრასტრუქტურული პროექტი განხორციელდება“, - აცხადებენ გორის მერიაში.