26 მაისს საქართველო დამოუკიდებლობის დღეს აღნიშნავს. თარიღთან დაკავშირებით, ქვეყნის მასშტაბით არაერთი აქტივობაა დაგეგმილი.

გორში ღონისძიებები შინაგან საქმეთა სამინისტროს ორგანიზებით გაიმართება და მთელი დღის განმავლობაში გაგრძელდება.

უწყების ინფორმაციით, საზეიმო პროგრამა 12:00 საათიდან დაიწყება და სტუმრებს საშუალება ექნებათ, შემეცნებით, გასართობ და სპორტულ აქტივობებში მიიღონ მონაწილეობა.

„საქართველოს მთავრობის ადმინისტრაციის ორგანიზებით დაგეგმილი პროგრამა გორის ცენტრალურ მოედანზე 12:00 საათიდან დაიწყება და მოსულ სტუმრებს საშუალება ექნებათ: შინაგან საქმეთა სამინისტროს სპეციალურად მოწყობილ ინტერაქციულ სივრცეებში დანაყოფების საქმიანობას გაეცნონ;

დაათვალიერონ სხვადასხვა დანაყოფის ტექნიკა და აღჭურვილობა;

პატარა სტუმრებისთვის მთელი დღის განმავლობაში წარმოდგენილი იქნება შემეცნებითი და გასართობი კუთხეები;

მოქალაქეებს საშუალება ექნებათ, „სიცოცხლის ზარის“ სტენდთან, „112“-ში შესულ რეალურ ზარებს მოუსმინონ;

წარმოდგენილი იქნება „ჭკვიანი ქალაქის“ კონცეფცია, სადაც ქალაქში მოხვედრამდე ბავშვები გაივლიან საპასპორტო კონტროლის ზონას, ასევე, მოსულ სტუმრებს სამახსოვრო პასპორტს გადასცემენ;

პატარებს დახვდებათ იმიტირებული ველორბოლის ბილიკი, რომლის გავლის შემდეგ ბავშვებს სიმბოლურად ველოსიპედის მართვის მოწმობა გადაეცემათ და კვარცხლბეკზე დაჯილდოვდებიან;

მოწყობილი იქნება იმიტირებული შემთხვევის ადგილი, სადაც ბავშვები მენტორი ექსპერტების დახმარებით გაეცნობიან, თუ როგორ ხდება სპეციალური ხელსაწყოების მეშვეობით შემთხვევის ადგილის დათვალიერება. ასევე, მოეწყობა ქიმიური შოუ;

იმიტირებულ დაცულ სახლში, მენტორების დახმარებით, მოზარდები თავად მოირგებენ პოლიციის აღჭურვილობას და შეასრულებენ პოლიციელის როლს;

საგანგებო სიტუაციების მართვის სამსახური ბავშვებისთვის დაამონტაჟებს „საცოც კედელს“;

წარმოდგენილი იქნება ვირტუალური ტირი და შინაგან საქმეთა სამინისტროს სხვადასხვა დანაყოფის ფორმები;

წარმოდგენილი იქნება სანაპირო და სახმელეთო სპეცტექნიკა;

მოეწყობა დრამების მარში;

წარმოდგენილი იქნება ადგილობრივი მეწარმეების კვების და ხელნაკეთი ნივთების სივრცეები;

სტუმრებს შესაძლებლობა ექნებათ დაათვალიერონ დამოუკიდებლობის დღისადმი მიძღვნილი თემატური საგამოფენო სივრცეები;

შესრულდება საქართველოს სახელმწიფო ჰიმნი;

ღონისძიება დასრულდება გალა კონცერტით. 26 მაისს შევხვდებით ქალაქ გორში. ერთად ვიზეიმოთ საქართველოს დამოუკიდებლობის დღე!“ - აღნიშნულია შინაგან საქმეთა სამინისტროს გავრცელებულ ინფორმაციაში.

ქრისტიანობის სახელმწიფო რელიგიად გამოცხადებიდან 1700 წლის იუბილესთან დაკავშირებით, საქართველოს დამოუკიდებლობის დღის ღონისძიებები კონცეფციით: „1700 წელია, რწმენა გვაძლიერებს - სიყვარული გვაერთიანებს“ გაიმართება.