7 სექტემბერი - წლის დასრულებამდე დარჩენილია 115 დღე.

ეს თარიღი მსოფლიო ისტორიაში ბევრი მნიშვნელოვანი მოვლენით, ცნობილი ადამიანების დაბადებით და საერთაშორისო დღეებით არის გამორჩეული.

ახალი წელთაღრიცხვით 70 წლის 7 სექტემბერს, რომაულმა არმიამ გენერალ ტიტუსის ხელმძღვანელობით საბოლოოდ აიღო და დაიმორჩილა იერუსალიმი. ისტორიაში ეს მოვლენები შევიდა სახელით - „იერუსალიმის ალყა“. ალყის დროს მთლიანად დაიწვა და განადგურდა იერუსალიმის მეორე ტაძარი, რომელიც ებრაული კულტურისა და რელიგიის მთავარი ცენტრი იყო. დღეს ამ ტაძრიდან მხოლოდ დასავლეთის კედელი, იგივე „გოდების კედელია“ შემორჩენილი.

ალყა რამდენიმე თვეს გრძელდებოდა. ქალაქში საკვებისა და წყლის მარაგი ამოიწურა, რამაც საშინელი შიმშილობა გამოიწვია. 7 სექტემბერს რომაელებმა იერუსალიმის ზემო ნაწილზეც მოიპოვეს კონტროლი და წინააღმდეგობა საბოლოოდ გატეხეს.

1772 წლის 7 სექტემბერს მოხდა კრწანისის პირველი ბრძოლა. ერეკლე II-ის მეთაურობით ქართველთა მცირე ლაშქარმა სასტიკად დაამარცხა ლეკებისა და ხანების გაერთიანებული 4000-კაციანი არმია, რომელიც თბილისის ასაღებად მოდიოდა.

1191 წელი - მესამე ჯვაროსნული ლაშქრობის დროს, ინგლისის მეფე რიჩარდ ლომგულმა არსუფის ბრძოლაში სალადინი დაამარცხა.

1812 წელი - ნაპოლეონის ომების დროს მოხდა ცნობილი ბოროდინოს ბრძოლა საფრანგეთსა და რუსეთის იმპერიას შორის.

1822 წელი - ბრაზილიამ პორტუგალიისგან დამოუკიდებლობა გამოაცხადა.

1940 წელი - მეორე მსოფლიო ომის დროს, ფაშისტურმა გერმანიამ დაიწყო ლონდონის მასობრივი დაბომბვა, რომელიც 57 ღამეს გაგრძელდა.

1977 წელი - ხელი მოეწერა ტორიხოს-კარტერის ხელშეკრულებებს, რომლის მიხედვითაც აშშ-მა პანამის არხის კონტროლი პანამას გადასცა.

1533 წელს დაიბადა ელისაბედ I - ინგლისისა და ირლანდიის დედოფალი, ტიუდორების დინასტიის უკანასკნელი მონარქი.

1914 წელს დაიბადა ჯეიმზ ვან ალენი - ამერიკელი ფიზიკოსი, რომელმაც დედამიწის რადიაციული სარტყელები აღმოაჩინა.

7 სექტემბერს ბრაზილია ეროვნულ დღესასწაულს - ბრაზილიის დამოუკიდებლობის დღეს აღნიშნავს.

გაეროს კალენდრით, 7 სექტემბერს აღინიშნება სუფთა ჰაერის საერთაშორისო დღე - ,,ლურჯი ცისთვის“.