8 ოქტომბერი ისტორიაში არაერთი უმნიშვნელოვანესი პოლიტიკური, კულტურული და ტრაგიკული მოვლენით არის გამორჩეული.

2021 წლის ბათუმის ტრაგედია - ბათუმში, 26 მაისის ქუჩაზე, საცხოვრებელი კორპუსის მთლიანი სადარბაზო ჩამოინგრა. უბედურ შემთხვევას 9 ადამიანის სიცოცხლე ემსხვერპლა, მათ შორის სამი ბავშვი იყო. მომხდარის გამო ქვეყანაში 11 ოქტომბერი გლოვის დღედ გამოცხადდა.

ერეკლეობა - ტრადიციულად, 7-8 ოქტომბერს, კახეთში (განსაკუთრებით თელავში), აღინიშნება ერეკლე II-ის დაბადების დღე - „ერეკლეობა“, რომელიც ეძღვნება გამორჩეული ქართველი მეფისა და სახელმწიფო მოღვაწის ხსოვნას.

1871 წელი - ჩიკაგოს დიდი ხანძარი - აშშ-ში გაჩნდა ისტორიაში ერთ-ერთი ყველაზე გამანადგურებელი ჩიკაგოს დიდი ხანძარი.

სტიქიამ 300-მდე ადამიანი იმსხვერპლა, გაანადგურა 17 000-ზე მეტი შენობა და თითქმის 100 000 მცხოვრები უსახლკაროდ დატოვა.

1967 წელი - ბოლივიის ჯუნგლებში სამხედროებმა შეიპყრეს ლეგენდარული ლათინოამერიკელი რევოლუციონერი ერნესტო ჩე გევარა, რომელიც მომდევნო დღეს სიკვდილით დასაჯეს.

1970 წელი - რუს მწერალსა და დისიდენტს, ალექსანდრე სოლჟენიცინს, ლიტერატურის დარგში ნობელის პრემია მიენიჭა.

1991 წელი - ხორვატიის პარლამენტმა ოფიციალურად გაწყვიტა ყველა იურიდიული კავშირი იუგოსლავიასთან, რის გამოც ეს თარიღი ქვეყანაში მნიშვნელოვან სახელმწიფო დღესასწაულად მიიჩნევა.