საზოგადოება
22.03.2022 11:21
კორონავირუსის ვაქცინაციის წახალისების პროგრამა აპრილშიც გრძელდება
უწყებათაშორისი საკოორდინაციო საბჭოს გადაწყვეტილებით, კორონავირუსის ვაქცინაციის წახალისების პროგრამა აპრილის თვეშიც გრძელდება, - ამის შესახებ უწყებათაშორის საკოორდინაციო საბჭოსთან არსებული ოპერაციული შტაბის უფროსმა გიორგი ღიბრაძემ მთავრობის ადმინისტრაციაში გამართულ ბრიფინგზე განაცხადა.
ღიბრაძის თქმით, 200-ლარიან ერთჯერად დანამატს 50 წლის და მეტი ასაკის ყველა ის მოქალაქე ავტომატურად მიიღებს, ვინც კორონავირუსის საწინააღმდეგო ვაქცინას გაიკეთებს.
ამასთან, ამავე ასაკობრივი ჯგუფის პირები 100 ლარიან დანამატს „ბუსტერ დოზის“ გაკეთების შემთხვევაში მიიღებენ.
ცნობისთვის, უწყებათაშორისი საკოორდინაციო საბჭოს გადაწყვეტილებით, კორონავირუსთან დაკავშირებით არსებული ყველა შეზღუდვა, გარდა ტრანსპორტსა და დახურულ სივრცეში პირბადის ტარების ვალდებულებისა, უქმდება.
