კულტურა
27.06.2025 15:18
გორის სამხატვრო სკოლაში ირაკლი ბაინდურაშვილის პერსონალური გამოფენა გაიხსნა
ანა ფერაძის სახელობის სამხატვრო სკოლა გორელი მხატვრის ირაკლი ბაინდურაშვილის პერსონალურ გამოფენას მასპინძლობს.
აბსტრაქციის ჟანრში შესრულებულ ნახატებთან და გობელინთან ერთად, საგამოფენო დარბაზში, ასევე, გამოფენილია მხატვრის მეუღლის - ცირა მგალობლიშვილის მიერ შესრულებული ნაქარგებიც.
გორის მუნიციპალიტეტის კულტურის სააგენტოს ინფორმაციით, ფერწერით დაინტერესებულ პირებს ცნობილი მხატვრის, მხატვართა კავშირის წევრის ნამუშევრების დათვალიერება მომდევნო ორი კვირის განმავლობაში შეეძლებათ.
ირაკლი ბაინდურაშვილი სხვადასხვა დროს ეწეოდა პედაგოგიურ საქმიანობას და აქტიურად მონაწილეობს გამოფენებში. წელს მხატვარს 79 წელი შეუსრულდა.
