საქართველოს საპენსიო ფონდმა 31 ივლისის სტატისტიკური მონაცემები გამოაქვეყნა.

როგორც ინფორმაციაშია აღნიშნული, 2026 წლის 31 ივლისის მდგომარეობით, საპენსიო სქემაში გაწევრიანებულ მონაწილეთა რაოდენობა 1 მილიონ 758 ათასი ადამიანია. ამ დროისთვის, დაგროვებითი პენსიით კი 34 826-მა პირმა ისარგებლა და მათზე პენსიის სახით 178,197,376.89 ლარი გაიცა.

„ივლისის ბოლოსთვის საქართველოს საპენსიო ფონდის აქტივებმა 9.7 მილიარდ ლარს მიაღწია, ხოლო დაგენერირებულმა ამონაგებმა 2.9 მილიარდ ლარს გადააჭარბა“, - აცხადებენ საქართველოს საპენსიო ფონდში.

რაც შეეხება იმას, თუ როგორ უნდა ისარგებლოს პირმა დაგროვებითი პენსიით, ფონდის ინფორმაციით, „დაგროვებითი პენსიის შესახებ“ საქართველოს კანონის საფუძველზე, პენსიის/საპენსიო აქტივების მიღება შესაძლებელია შემდეგ შემთხვევებში:

მონაწილის მიერ საპენსიო ასაკის მიღწევისას;

მონაწილის შესაძლებლობის შეზღუდვისას;

საპენსიო აქტივების მონაწილის მემკვიდრისთვის გადაცემისას;

საქართველოს სამუდამოდ დატოვებისას.