„დევნილთა და ეკომიგრანტთა აგრომეურნეობების ხელშეწყობის პროგრამის“ ფარგლებში განაცხადების მიღება დაიწყო.

დევნილთა, ეკომიგრანტთა და საარსებო წყაროებით უზრუნველყოფის სააგენტოს ინფორმაციით, პროგრამაში გამარჯვებულ იძულებით გადაადგილებულ პირებს სააგენტო სასოფლო-სამეურნეო საქმიანობის ხელშეწყობის მიზნით, ხელის ტრაქტორებს, სხვადასხვა სახეობის მრავალწლიან კულტურებს, სასოფლო-სამეურნეო, სურსათის წარმოების და გადამუშავებისთვის საჭირო ინვენტარს შეუძენს.

„პროგრამის მთავარ მიზანს დევნილთა და ეკომიგრანტთა სასოფლო-სამეურნეო ინიციატივების მხარდაჭერა წარმოადგენს, რაც ხელს შეუწყობს მათი შემოსავლის ზრდას. მთელი ქვეყნის მასშტაბით, იძულებით გადაადგილებული 300-მდე პირი დაფინანსდება“, - აცხადებენ სააგენტოში.

განაცხადების მიღება სააგენტოს და მის ტერიტორიულ სამსახურებში (გორი, სამების №1) 31 ივლისის ჩათვლით გაგრძელდება. გარდა ამისა, მსურველებს განაცხადის გაგზავნა სააგენტოს ოფიციალურ ელექტრონულ ფოსტაზეც: info@ idp. gov.ge შეუძლიათ.