2026 წლის ერთიანი ეროვნული გამოცდებისა და სტუდენტთა საგრანტო კონკურსის მონაწილეებისთვის საპრეტენზიო განაცხადების მიღება ხვალ, 4 აგვისტოს 10:00 საათიდან დაიწყება და 6 აგვისტოს 18:00 საათამდე გაგრძელდება.

მონაწილეებს შესაძლებლობა ექნებათ, შეფასებისა და გამოცდების ეროვნულ ცენტრს განაცხადებით მიმართონ. საპრეტენზიო განაცხადები კი მხოლოდ ელექტრონულად, ვებგვერდზე: online.naec.ge მიიღება.

„გამოსაცდელებს შეუძლიათ გაასაჩივრონ როგორც ერთი, ასევე რამდენიმე დავალება. საპრეტენზიო განაცხადის შევსების საფასურს გამოსაცდელი განაცხადის შევსებამდე იხდის და ერთი გამოცდის შედეგის გასაჩივრების საფასური 50 ლარია. ქულის მომატების ან დაკლების შემთხვევაში თანხა განცხადების საფუძველზე დაბრუნდება.

შეფასებისა და გამოცდების ეროვნული ცენტრი კიდევ ერთხელ შეახსენებს აბიტურიენტებს, რომ საგანმანათლებლო პროგრამების რეიტინგულ სიაში ცვლილებების შეტანას გამოსაცდელები საპრეტენზიო განაცხადებზე პასუხების გამოქვეყნების მომდევნო დღის 18:00 საათამდე შეძლებენ.

საპრეტენზიო განაცხადის შევსების დეტალური ინსტრუქცია კი ხვალ, 4 აგვისტოს გამოქვეყნდება“, - აცხადებენ შეფასებისა და გამოცდების ეროვნულ ცენტრში.