იშვიათი დაავადებების სამკურნალო სახელმწიფო პროგრამა ფართოვდება, - ინფორმაციას აღნიშნულის შესახებ დევნილთა, შრომის, ჯანმრთელობისა და სოციალური დაცვის სამინისტრო ავრცელებს.

უწყების ინფორმაციით, სახელმწიფო, ცისტური ფიბროზით დაავადებული პაციენტებისთვის საინჰალაციო პრეპარატებისთვის ანტიბიოტიკებს, ვიტამინებს და სხვა მედიკამენტებს შეისყიდის. იზრდება მათთვის სტაციონარული მომსახურების დაფინანსებაც.

როგორც ჯანდაცვის მინისტრმა მიხეილ სარჯველაძემ აღნიშნა, პროგრამაში განხორციელებული ცვლილება პაციენტთა საჭიროებების გათვალისწინებით, მათი ოჯახის წევრებთან რეგულარული კომუნიკაციის საფუძველზე მოხდა. მინისტრის თქმით, ჯანდაცვის სამინისტრო განაგრძობს მუშაობას პროგრამის გაფართოებაზე, მათ შორის, პაციენტების საჭიროების შესაბამისად, ფიზიოთერაპიის სერვისების შეთავაზებასა და სხვა მედიკამენტების შესყიდვაზე. 

„განხორციელებული ცვლილების ფარგლებში, პაციენტებს დაუფინანსდებათ: ანტიბიოტიკები ტობრამიცინი და კოლომიცინი, ცხიმში ხსნადი ვიტამინების კომპლექსი (A, D, E, K), მუკონები (ჰიპერტონული ხსნარი) -  3% და 6%-იანი, კომბინირებული პრეპარატი - იპრატროპიუმ ბრომიდი მონოჰიდრატის, ფენოტეროლ ჰიდრობრომიდი, აცეტილცისტეინი (მუკოლიზური და ამოსახველებელი), ურსოდეოქსიქოლის მჟავა (ჰეპატოპროტექტორი).

აღნიშნული პრეპარატები მკვეთრად გააუმჯობესებს პაციენტის ცხოვრების ხარისხს  და ხელს შეუწყობს დაავადების მართვას, გართულებების თავიდან აცილებას და მკურნალობის შედეგების გაუმჯობესებას. მედიკამენტებით უზრუნველყოფა ეტაპობრივად - ოქტომბერსა და ნოემბერში დაიწყება.

ეს უკვე მეორე ცვლილებაა, რომელიც იშვიათი დაავადებების სახელმწიფო პროგრამაში 2025 წელს განხორციელდა.  სამინისტრომ, ივლისში, რეგიონებში მცხოვრები გაფანტული სკლეროზის მქონე პაციენტებისთვის სამკურნალო მედიკამენტებისა და კვლევების დაფინანსება დაიწყო.

პროგრამის ჯამური ბიუჯეტი კი 55 000 000 ლარია“, - აცხადებენ სამინისტროში.